Annelize Morgan Omnibus 4 / Annelize Morgan-omnibus Bd.4 (ePub)

Slavin van La Liberté_x000D_

Toe Leia as jong skipbreukeling aan die ooskus van Afrika uitspoel, het Tembisa, 'n inboorlingvrou, haar gevind en grootgemaak. Net voor Tembisa se dood het sy vir Leia 'n kosbare goue hangertjie met 'n vreemde embleem daarop gegee. Dit was om haar nek toe sy gevind is. "Jy moet die pad loop waarheen dit jou neem," het Tembisa gesê. "Jy hoort waar die hangertjie vandaan kom . . ."_x000D_

_x000D_

Leia se lewe slaan dan ook onherroeplik 'n nuwe rigting in wanneer sy gevange geneem word deur 'n slawehandelaar, Lantini, en verkoop word aan die aantreklike graaf Jacques de la Fontaine. Die beeldskone wit slavin se koms op La Liberté veroorsaak 'n beroering. Sy is glad nie gedienstig nie, en haat haar ingeperkte vryheid en die mense wat dit veroorsaak intens. Haar sonderlinge skoonheid en ingebore adellikheid val mense op en bring komplikasies mee. Lantini wil haar graag terughê om teen 'n hoër prys van die hand te sit, en Beatrice de Boudelaire, die graaf se toekomstige vrou, wil haar tot elke prys weg hê van La Liberté._x000D_

_x000D_

Intussen is daar nog die goue hangertjie met die vreemde embleem wat die enigste sleutel is tot Leia se vergete verlede . . ._x000D_

_x000D_

Gister se verlange_x000D_

Na twintig jaar in 'n klooster in Frankryk, hoor Rozanne de Savoye dat haar moeder nog leef en waarskynlik iewers aan die Kaap de Goede Hoop woon. Bykans ekstaties van vreugde en opwinding reis Rozanne na die Kaap - om sommer uit die staanspoor met teleurstellings en teenslae te doen te kry. Boonop raak sy vergeefs verlief op Armand le Riche, 'n aantreklike jong avonturier wat haar leer dat die liefde maar net 'n speletjie is._x000D_

_x000D_

Rozanne se teenwoordigheid aan die Kaap skep spanning in die lewens van baie mense: Armand se ouers wat haar as 'n klein fortuinsoekster sien; die bekoorlike Angélique wat vier jaar lank op Armand se tuiskoms gewag het; Jacques le Riche, wat haar vir sy eie geldsugtige doeleindes wil gebruik; en Armand se tante wat met vrees en bewing verneem het van die jong "non" wat gekom het om die verlede oop te krap . . . Die spanning tril later snaarstyf, want 'n gemaskerde boosdoener probeer boonop telkens om Rozanne uit die weg te ruim._x000D_

_x000D_

Geliefde banneling_x000D_

Vir Theresa Verhoef, die vaal dogter van Barnard Verhoef vir wie hy geen liefde het nie, lyk die toekoms baie duister. As deel van 'n saketransaksie moet sy met die losbol-buurman Sias Beneke trou, en sy het haar pa se wense nog altyd gehoorsaam. Maar wat moet sy doen as sy die buurman verfoei?_x000D_

Toe Theresa Sias kort voor hulle huweliksbekendmaking met sy vorige meisie in 'n omhelsing betrap, weet sy vir seker dat sy nié met die klugspel kan voortgaan nie. Sy jaag die veld koersloos op haar perd in en loop haar trompop vas in die gevreesde El Toro en sy bendelede, wat reeds tien jaar lank 'n skrikbewind voer op Pelgrimsrus en die omliggende delwerye._x000D_

_x000D_

Toe hulle uitvind wie haar pa is, besluit hulle dadelik dat dit hulle lang verwagte kans is om terug Europa toe te gaan, en hulle eis 'n losprys van tienduisend pond van haar pa. Maar wat gaan hulle doen wanneer hulle uitvind dat Barnard Verhoef nie bereid is om 'n pennie vir sy lelike dogter te betaal nie? En gaan haar jongmeisiedrome van jare gelede bewaarheid word?